Cənubi Koreya hökuməti doğum nisbətinin kəskin azalmasının qarşısını almağa çalışır, lakin siyasətçilər 20-30 yaşlarında olan bir çox insanı uşaq sahibi olmağın dəbli geyimlərdən və ya bahalı restoranlardan daha yaxşı investisiya olduğuna inandırmaqda çətinlik çəkirlər.
NOCOMMENT.az xəbər verir ki, Asiyanın dördüncü ən böyük iqtisadiyyatı demoqrafik problemlərlə məşğul olacaq yeni nazirlik yaratmağı planlaşdırır. “Reuters” yazır ki, bu nazirliyin yaradılması qərarı vazektomiyanın ləğvi üçün subsidiyalar, yeni doğulmuş ailələrə maliyyə dəstəyi, pulsuz taksi gəzintiləri və daha uzun ödənişli valideyn məzuniyyətləri daxil olmaqla, onlarla tədbirin doğum nisbətindəki azalmanın qarşısını ala bilməməsindən sonra verilib.
Gənclər “həyatda yalnız bir dəfə yaşayırsan” prinsipini müdafiə edirlər. Onlar ailə qurmağa can atmır, daha az uşaq sahibi olmağı düşünürlər. Gənclərin diqqətinin həyatdan daha çox həzz almağa yönəlməsi onların dünyaya uşaq gətirməsi üçün subsidiya verilməsi üzrə hökumət siyasətinə niyə reaksiya vermədiyini açıq şəkildə izah edir.
Cənubi Koreya keçən il yeni minimuma çatan dünyanın ən aşağı doğum səviyyəsi üzrə özünəməxsus rekordu qırmağa davam edir. 2023-cü ilin sonunda ölkədə doğum səviyyəsi daha 8 faiz azalıb. Bütün inkişaf etmiş ölkələrdə məhsuldarlığın azalması müşahidə olunur, lakin onlarda bu proses Cənubi Koreyadakı kimi kəskin formada deyil. Belə ki, 50 ildən sonra əməkqabiliyyətli vətəndaşların sayının iki dəfə, icbari hərbi xidmət keçmək hüququ olanların sayının isə 58 faiz azalacağı gözlənilir. Əhalinin təxminən yarısı 65 yaşdan yuxarı insanlar olacaq.
Sosioloqların fikrincə, Y və Z nəsilləri kimi tanınan 20-30 yaşlarında olan koreyalıların həyat tərzi prioritetləri ondan ibarətdir ki, onlar orta hesabla əhalinin ümumi sayı nisbətində və ya digər ölkələrdəki həmyaşıdlarından daha çox pul xərcləyir və daha az qənaət edirlər.
“Onlar status axtarırlar. Gənclərin böyük məbləğdə pul xərcləmə vərdişləri göstərir ki, onlar ailə qurmaq və uşaq sahibi olmaq kimi əlçatmaz məqsədlərə diqqət yetirməkdənsə, öz onlayn uğur simvolları üzərində işləyirlər” –deyə Seul Qadın Universitetinin sosiologiya professoru İhva Çon Çje Hun vurğulayıb.
Hətta Cənubi Koreyanın son üç ildəki kəskin faiz artımı da gənclərin xərclərini cilovlaya bilməyib. Belə ki, 20-30 yaşlarında olan gənclər ən çox pulu univermaqlarda və lüks otellərdə xərcləyirlər, onların səyahət xərcləri isə son üç ildə 33,3 faizdən 40,1 faizə yüksəlib. Keçən il “Morgan Stanley”in apardığı araşdırmaya görə, koreyalıların mükəmməl zövqləri onları adambaşına düşən lüks brendlərin dünyada ən böyük istehlakçısına və əsas dəbdəbəli məhsulların məşhur alıcısına çevirib.
May ayında araşdırma firması “PMI Co” tərəfindən aparılan sorğuya görə, Cənubi Koreya gənclərinin uşaq sahibi olmamasının əsas səbəbi maliyyə çətinlikləri ilə bağlıdır.
“Pew” Tədqiqat Mərkəzinin həyatı mənalı edən amillərlə bağlı 2021-ci ildə 17 inkişaf etmiş ölkəni əhatə edən sorğusunda Cənubi Koreya yeganə ölkə olub ki, maddi rifah hər şeydən öndə göstərilib. Başqa ölkələrdə əsas cavablar ailə və ya sağlamlıqla bağlı idi.
