Xokkey üzrə ikiqat olimpiya çempionu, Dövlət Dumasının deputatı Vyaçeslav Fetisov Rusiyada ikili vətəndaşlığın mümkün ləğvi barədə danışıb.
NOCOMMENT.az xəbər verir ki, onun sözlərini Sport24 sitat gətirir.
Fetisov bildirib ki, onun heç vaxt ikili vətəndaşlığı olmayıb, ona görə də bunu müzakirə etmək onun üçün çətindir. “Mən Rusiya Federasiyasının vətəndaşıyam və bununla fəxr edirəm. Amma dünyada bu formatı təklif edən bir çox ölkələr var. İstənilən halda qanun layihəsinin müzakirəsi zamanı bütün müsbət və mənfi cəhətlər ölçüləcək”, – deyə o qeyd edib.
Fetisov əlavə edib ki, idmanda vətəndaşlıq məsələsi başqadır. “İdman vətəndaşlığı var. Amma yenə də insanlar müəyyən şəraitə görə qərarlar verirlər, çünki müxtəlif hadisələr baş verir” deyə izah edib və hər bir işin fərdi olduğunu vurğulayıb.
Bundan əvvəl keçmiş rusiyalı tennisçi, hazırda Qazaxıstanı təmsil edən Aleksandr Bublik vətəndaşlığını dəyişdiyinə görə peşman olmadığını bildirib. O əlavə edib ki, Qazaxıstanda ikili vətəndaşlığa icazə verilmədiyi üçün hazırda onun Rusiya pasportu yoxdur.
