İŞİD yalnız Yaxın Şərqdə deyil, həm də Avropanın ürəyində öz təsirini bərpa etməyə çalışır. Əvvəllər qruplaşmanın əsas silahı vizual təbliğat və peşəkar şəkildə montajlanmış videolar idisə, bu gün radikallar süni intellektdən istifadə edir.
NOCOMMENT.az xəbər verir ki, süni intellekt İŞİD ilə Avropalı gənclər arasında yeni ünsiyyət interfeysi rolunu oynayır. Bu gənclər xəlifətin hökm sürdüyü dövrdə yaşamayıblar, onun cinayətlərini görməyiblər, lakin rəqəmsal gizli dünyaya asanlıqla cəlb olunurlar.
Teleqrafın məlumatına görə, qruplaşma ilk dəfə olaraq süni intellektdən istifadə edərək ərəb dilindəki mətnləri onlarla başqa dilə — ingilis, tagal və s. — avtomatik tərcümə edir. Mətnlər sosial şəbəkələrdə blok edilə bilməzdən əvvəl yayılır.
Britaniyanın MI5 və MI6 kəşfiyyat orqanları artıq İŞİD-dən “qalıq” kimi danışmır, onun qlobal oyunçu kimi geri dönməyə çalışdığını bildirir. MI5 rəhbəri Ser Ken MakKallum illik hesabatında İŞİD və “Əl-Qaidə”nin beynəlxalq sabitlikdəki boşluqlardan istifadə etdiyini vurğulayır. Son dövrdə Britaniya gənclərinin Suriyaya getmək cəhdləri artıb; ötən həftə Gətvik hava limanında 18 yaşlı bir gənc saxlanılıb.
Suriya ərazisində İŞİD-in partizan hücumları artmaqda davam edir və Britaniya Hərbi Hava Qüvvələri “Şeyder” əməliyyatında iştirak edir. Ötən il Britaniya pilotsuz uçağı İŞİD komandanlarından birini Şimali Suriyada zərərsizləşdirib.
Ekspertlər xəbərdarlıq edirlər ki, İŞİD indi Avropada fiziki yox, rəqəmsal xəlifət qurmağa çalışır. Gələcəkdə problem yalnız silahlı ekstremistlərdə deyil, eyni zamanda onları formalaşdıran süni intellektdə olacaq.
