İstər bayram ərəfəsində, istərsə də adi günlərdə insanlar vəfat edən yaxınlarının məzarını ziyarət edir. Bu zaman qəbiristanlıqda olan mollalar peyda olub, onlara mərhum üçün dua oxumağı təklif edir. Əksər hallarda isə onların səsləndirdiyi duaları heç kəs başa düşmür.
NOCOMMENT.az xəbər verir ki, ilahiyyatçı Əkrəm Həsənov bu barədə“Yeni Sabah”a bildirib ki, belə bir qayda dinimizdə yoxdur.
Onun sözlərinə görə, məzar başında dua oxumaq sadəcə qədim bir adətdir:
“Qəbiristanlıqda dua oxuyan mollaların heç bir dini anlayışı və savadı yoxdur. Onlar Quran ayələrinin düzgün oxunuş qaydalarını belə bilmirlər. Digər tərəfdən isə, məzarlıqda dua oxumaq İslam dinində bəyənilməyən əməldir. Çünki peyğəmbərimizin özü də qəbir ziyarətinə gedən zaman orada Quran ayələrini səsləndirməyib. Bu sadəcə qədimdən günümüzə keçən adətlərdən biridir. Dünyadan köçən yaxınlarının məzarına gedənlər orada ancaq mərhumun günahlarının bağışlanılması üçün dualar edə bilər. Qurani-Kərim insanlar üçün nəzərdə tutulan müqəddəs kitabdır. Onun dünyadan köçən şəxsə heç bir faydası yoxdur. Dünyada olarkən, bu kitabı oxumaq daha doğrudur. Bu kitab dünya əhalisi üçün yer üzünə nazil olub. Yaşadığımız həyat boyunca hansı əməlləri yerinə yetirməli olduğumuzu bilmək, axirət barədə məlumatlı olmaq və digər səbəblər üçün Quranda yazılan ayələri oxumaq doğrudur. Ölən insana qəbir əzabından xilas olmaqdan ötrü və günahlarının əfv edilməsi üçün dualar edilməlidir”.
İlahiyyatçı vurğulayıb ki, bu barədə insanlar maarifləndirilməlidir:
“Bəzən görürük ki, molla şəxsən adama yaxınlaşıb dua oxumağı təklif edir. Çox vaxt bunun üstündə məzarlıqda dava-dalaş da olur. Bu doğru hal deyil. Mollaların bu cür təkliflərini qəbul etməmək daha uyğundur. Qəbiristanlıq mollalarına dövlət və dini qurumlar tərəfindən nəzarət olmalıdır. Aidiyyatı təşkilatlar bu məsələyə ciddi yanaşmalıdırlar.Çünki mollalar bu yolla insanları sadəcə aldadırlar. Əhali arasında maarifləndirmə işləri aparılmalıdır. Məscidlərə namaz qılmaq üçün gələn insanlara həmin məsələ barədə müəyyən informasiyalar çatdırılır. Lakin əksər adam bununla bağlı kifayət qədər məlumatlı deyil. Bu səbəbdən, efirlərdə də belə mövzulara yer ayrılmalıdır”.
