Banqladeş məhkəməsi Nobel Sülh Mükafatı laureatı Məhəmməd Yunusa 6 ay həbs cəzası verib.
NOCOMMENT.az xəbər verir ki, bu barədə “Dhaka Tribune” qəzeti yazır.
Nəşrin məlumatına görə, Yunusla bərabər onun təsis etdiyi “Grameen Telecom” telekommunikasiya şirkətinin rəhbəri Əşrəful Həsən də məhkum edilib. Hər ikisi də bir maddə ilə 5 min taka (45 dollar), digər maddə ilə isə 25 min taka (227 dollar) cərimə olunub. Cərimələri ödəmədiklərinə görə məhkumları müvafiq olaraq əlavə 10 və 15 gün həbs gözləyir.
83 yaşlı iqtisadçı Məhəmməd Yunus 2006-cı ildə iqtisadi inkişafla bağlı fəaliyyətinə görə Nobel Sülh Mükafatına layiq görülüb. O, 1983-cü ildə təsis etdiyi “Grameen Bank” vasitəsilə Banqladeşin kəndlərində yoxsullara mikrokreditlər verməyə başladıqdan sonra beynəlxalq səviyyədə tanınıb.
Daha sonra ölkənin baş naziri Şeyx Hasina Yunusu fermerləri maliyyə əsarəti altına almaqda günahlandırıb, onlar alınan kreditlərə görə illik təxminən 20% faiz ödəməlidirlər.
