Ermənistanda keçirilən seçkilərdə məğlub olan Rusiya indi də ümidini Dağlıq Qarabağdakı separatçı rejimin siyasi rəhbərliyini ələ keçirməyə bağlayıb. Bu məqsədlə Xankəndidə Arayikin istefası tələbi ilə mitinq təşkil olunub.
NOCOMMENT yenisabah-a istinadən xəbər verir ki, hadisəni şərh edən siyasi şərhçi, AXCP üzvü Fuad Qəhrəmanlının sözlərinə görə, Moskva narahatdır ki, Araik Paşinyanın siyasi kursunu dəstəkləyərsə, o zaman Dağlıq Qarabağ kartından istədiyi kimi istifadə edə bilməyəcək: “Xüsusilə ilə də Dağlıq Qarabağla bağlı danışıqlarda Qərbin diplomatik və siyasi təşəbbüsü ələ alması, bu üzdən də Moskvanın proseslərə nəzarətinin zəifləməsi perspektivlərini nəzərə alanda, Putinin narahatlığını başa düşmək olur.
Bu üzdən də Rusiya Ermənistandakı siyasi məğlubiyyətindən sonra hələlik nəzarətində saxladığı işğal bölgəsində yeni revanşa cəhd edir.
Başqa bir məqsəd də Dağlıq Qarabağ üzərindən gərginlik yaradıb, Ermənistan daxilində siyasi böhran yaratmaq istəyidir. Çünki, parlament seçkilərində böyük üstünlük qazanmış Paşiniyanın Rusiya qarşısındakı möqeyini zəiflətməkdən ötrü indi Dağlıq Qarabağ kartı Putinin əlində qalan yeganə vasitədir.
Moskva gözəl başa düşür ki, siyasi və diplomatik nəzarət Qərbin əlinə keçərsə, o halda Dağlıq Qarabağdakı hərbi iştirakı da perspektivdə sual altına düşə bilər. O üzdən də qondarma rejimin Təhlükəsizlik Şurasının rəhbəri Vitali Balasanyanı Araikin yerinə gətirmək istəyir”.
