Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi (“ASAN Xidmət”) tərəfindən keçirilən tender müsabiqəsinin nəticəsi ləğv olunub.
NOCOMMENT.az xəbər verir ki, müsabiqənin nəticəsi İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin 19 dekabr 2023-cü il tarixli 3-21-1/2-26600/2023 saylı məktubuna əsasən ləgv olunub.
Bildirilir ki, “ASAN Xidmət” mərkəzlərində mövcud olan fəvvarələrin saxlanılması üçün mal və materialların satın alınması məqsədi ilə keçirilən tender müsabiqəsi (Kotirovka sorğusu) zamanı “Dövlət Satınalmaları Haqqında” Qanunun 38.2-ci maddəsinin tələbləri pozulub.
“Dövlət Satınalmaları Haqqında” Qanunun 38.2-ci maddəsində qeyd olunur ki, tender komissiyası bu Qanunla müəyyənləşdirilmiş vəzifələrini yerinə yetirərkən qeyri-obyektivliyə yol verərək, hər hansı iddiaçının tərəfini saxlayarsa, iddiaçılardan hər biri müvafiq icra hakimiyyəti orqanına və ya məhkəməyə müraciət edə bilər. Həmin orqanlar tenderin hazırlanması və keçirilməsi zamanı qanun pozuntusuna yol verildiyini təsdiqləyərsə, tenderin nəticələri ləğv olunur və satınalan təşkilat həmin iş üzrə yeni tender keçirir. Bu halda qəbul olunmuş qərardan fərqlənən xüsusi rəy vermiş komissiya üzvlərindən başqa, komissiyanın sədri və digər üzvləri 3 il müddətində hər hansı tender komissiyasının sədri və ya üzvü ola bilməzlər./Yeniavaz
