Bu ilin ikinci ən çox gəlir əldə edən filmi halına gələn və dünyada gündəmdən düşməyən “Barbie” filminə qadağa qoyan ölkələrin sayı artmaqdadır.
NOCOMMENT.az xəbər verir ki, iyulun əvvəlində Vyetnam bir səhnədə Çinin Cənubi Çin dənizindəki iddialarını göstərən “doqquz tire” xəritəsindən istifadə etdiyi üçün filmi qadağan etdi.
Bu ilin ikinci ən çox gəlir gətirən filmi olmağı bacaran Barbie filmi Livanda nümayiş olunmayacaq. Livanın mədəniyyət naziri Məhəmməd Mortada verdiyi yazılı açıqlamada “Barbie” filminin “homoseksuallığı təbliğ etdiyi” və dini dəyərlərə zidd olduğu səbəbilə kinoteatrlarda nümayiş olunmayacağını açıqlayıb. Bəyanatda deyilir ki, film “homoseksuallığı və cinsi transformasiyanı təbliğ edir” və ailə birliyini aşağı salmaqla “inanc və əxlaqa ziddir”.
Film Livandan sonra Küveytdə də qadağan edilib. Küveyt mətbuatında çıxan xəbərlərdə Küveytin “ictimai etika”nı qorumaq üçün sözügedən qərarı aldığı qeyd edilib.
Vyetnam, Livan və Küveytdəki qadağa qərarından sonra filmin Pakistanın Pəncab əyalətində nümayişi filmdə “uyğun olmayan məzmun” olduğu səbəbilə təxirə salınıb. Keçən ay açıqlama verən Pakistan rəsmiləri etiraz edilən məzmunun nə olduğu barədə açıqlama vermədilər.
Filmin nümayişi uzun müddət müzakirə edilən ölkələrdən biri də Filippin olub . Filippin ada ölkəsi filmə qadağa qoymaq əvəzinə, filmdə yer aldığı iddia edilən Cənubi Çin dənizində Çinin iddia etdiyi torpaqları göstərən “doqquz tire” xəritəsini kəsib dərc etmək qərarına gəlib.
