“Azərbaycanın Rus Gəncləri Assosiasiyası” İctimai Birliyinin sədri Roman Yusifovun anası Yelena Korabelnikova mətbuat konfransı keçirərək, oğlunun Milli Məclisin deputatı Mixail Zabelin tərəfindən saxta ittihamlarla həbs etdirildiyini deyib. Bildirib ki, fevralın 11-də oğlunu deputat Mixail Yuryeviç Zabelinin tələbi ilə Baş Mütəşəkkil Cinayətkarlıqla Mübarizə İdarəsinin əməkdaşları saxlayıblar.
“Oğlum 2018-ci ilin sentyabrından Zabelinə məxsus şirkətdə direktor işləyib. Mən bu şirkətdə kassir işləyirdim. Şirkətdə işlədiyi bütün illər ərzində direktorun maaşı heç vaxt ödənilməyib, yalnız hər şeyin təxminən ödəniləcəyini vəd edirdilər. 2,5 ildir ki, maaşım verilmir. Eyni şey digər işçilərə də aiddir. Müəssisədə avadanlıqlar daim çatışmayan vəziyyətdə idi və 60 min manat məbləğində SNS aparatının alınması üçün kredit götürülməsinə qərar verildi. Şirkətdə külli miqdarda borcları olduğu üçün Roman maddi məsul şəxs kimi Bakıda 30 min manatlıq dəzgah taparaq, onu almaq və yerdə qalan məbləği işçilərin əmək haqqının ödənilməsinə, emalatxana və ofisin icarəyə verilməsinə və şirkətin s. borclarına verməyi qərara aldı. Bütün maliyyə hesabatları baxılması üçün dəfələrlə Mixail Yuryeviçə təklif olunub. O, şirkətin borclarını və pandemiya zamanı biznesdə hansı çətinliklərin yarandığını bilə-bilə, praktiki olaraq şirkətdə görünmədi və hesabatlara baxmaq istəmədi”, – deyə Korabelnikova bildirib.
Onun sözlərinə görə, oğlu deputata biznesini bağlamaq variantını təklif edib, çünki borclar hər gün daha çox yığılırmış və biznes sahibinin maliyyə gəlirləri minimal imiş: “Hazırda Roman hüquq-mühafizə orqanları tərəfindən saxlanılıb, çünki Mixail Yuryeviç Romandan borcunu ödəməsini istəyir. Kreditin girovu şəhərin mərkəzində Zabelinə məxsus yarım milyon manatlıq, 2 mərtəbəli dupleks mənzildir. Bu mənzil 2000-ci ildən bəri dəfələrlə Zabelinin biznesində müxtəlif kreditlər üçün girov qoyulub. Lakin bu dəzgahın hazırda harada yerləşdiyi məlum deyil, maşın Mixail Yuryeviçin əlaqə saxladığı fırıldaqçıların əlindədir”.
Qadın Prezident İlham Əliyevə müraciət edib: “Mixail Zabelin məni dəfələrlə yanına çağırdı və Milli Məclisdəki köməkçisi Firdovsi ilə birlikdə məni hədələdi və qorxutdu.
Onların sözlərini sözün əsl mənasında çatdıran, üzümə gülən Mixail Yuryeviç açıq-aşkar dedi ki, oğlumla məni sadə orqanlara yox, “bizim ağlımıza gəlməyən” orqanlara verəcəklər. Oğlumu oğurluqda, dələduzluqda ittiham edərək, hər şeyin hesabatlarda göstərildiyini və sənədləşdirildiyini deyən Mixail Yuryeviç belə cavab verdi: “Lazım olsa, sübut həmişə olacaq”. Köməkçisi Firdovsi isə əlavə etdi: “Bu sübutlar orada yaxşı “tikiləcək”. Siz həm krediti ödəyəcək, həm də orada sizdən yaxşı pul alacaqlar”.
Vətəndaşların mənafeyini müdafiə etməli olan deputat hədə-qorxu gələrək, olmayan ittihamlar irəli sürürsə, vətəndaşları həbs etdirirsə, vətəndaşların hansı hüquqlarından söhbət gedə bilər? Mən Zabelin Mixail Yuryeviçin bu qanunsuz hərəkətlərini ictimaiyyətə çatdırmaq istəyirəm, çünki indi onun oğluma və mənə qarşı hədələri əməllərdə təcəssüm olunur. Səhər mənə zəng gəldi və indi mən də Mixail Yuryeviçin mənə əvvəlcədən dediyi kimi, oğlumun saxlanıldığı İdarəyə gedirəm”.
Qeyd edək ki, söhbət hərtərəfli tikinti və memarlıq xidmətləri, interyer dizaynı və mebel xidmətləri göstərən “Euro-Asian Trading” şirkətindən gedir.
NOCOMMENT xəbər verir ki, M.Zabelin isə ayna-ya açıqlamasında ittihamları rədd edib: “Deputat kimi mənim və rus icmasının yaratdığı şirkətə rəhbərlik etmək hüququm yox idi. Şirkətdə işləmək üçün bütün imkanlar var idi: əvvəllər mənim hesabıma alınmış dəzgahlar və digər avadanlıqlar mövcud idi. Bəzən özünü Boriskin kimi təqdim edən Yusifov Roman firmaya rəhbərlik etmək arzusunda olduğunu bildirib. O, ailə vəziyyəti ilə əlaqədar əmək haqqı olaraq 11 ay müddətində 4000 manat avans istəyib. Bu vəsait ona verilib, qəbz var. 2018-ci ilin noyabr ayında 8000 manat məbləğində 2 ədəd aparat alınmasını xahiş edib. Bunun üçün də maliyyə ayrılıb.
Romanın anasının iddia etdiyi hər şey tamamilə yalandır. Roman 2019-cu ilin dekabrında 6000 manat, 2020-ci ilin sonunda isə 3000 manat maaş alıb. Onun hələ də oturub işlədiyi, şirkətdən oğurlanan pullarla öz şirkətini yaratdığı sexin və ofisin icarə haqqını ödəmişəm. O, mənim razılığım olmadan anasını kassir kimi qeydiyyata alıb, onun hərəkətlərini ört-basdır edib, mənimlə razılaşmadan, əmək müqavilələrini mənə təqdim etmədən dostlarını işə götürüb”.
“Amma Romanın anasının yaxşı bildiyi, dəfələrlə məndən onu bağışlamağımı xahiş edən dələduzluq hərəkətləri etməsəydi, heç bir şikayətim olmazdı. 2019-cu ilin noyabr ayında Boriskin-Yusifov Çində SNS (CNC freze) dəzgahı almaq üçün ümumilikdə 60 000 manat vəsait istəyib. Dedim ki, mənim belə vəsaitim yoxdur, bütün əmanətlərim xərclənib. Yalnız bankdan kredit götürmək imkanı var. Hansı ki, edildi və girov olaraq yaşadığım üçotaqlı mənzil qoyuldu. 2020-ci ilin əvvəlində Yusifov mənə SNS aparatını göstərdi, amma bəyannaməni göstərmədi, kompüterdə olduğunu dedi. Pandemiya şirkətin işini dayandırdı. Lakin 2020-ci ilin sonunda mənə məlum olduğu kimi, Yusifov sexin müdiri və onun müavini (dostları) ilə birlikdə mənə dediyi kimi Çindən deyil, Dərnəgüldəki hansısa mağazadan avadanlıq alıb, dələduzluq edib, şahidlər var”, – deyə deputat bildirib.
“Mən həmişə Yusifov Romana etibar etmişəm, ona oğul kimi baxmışam və onun tərəfindən belə saxtakarlıqla üzləşəcəyimi heç düşünməmişəm. Bütün bu müddət ərzində ona maaşımdan hər ay 2100 manat verirdim ki, krediti qaytarsın.
Romanın və onun dəzgah məsələsində əlbir olan şəxslərin dələduzluğu üzə çıxanda, o bağışlanmasını xahiş edərək yanıma gəlib, qalan kredit məbləğini şəxsən ödəməyi öhdəsinə götürüb. Razılaşdım və ona güzəşt etdim. Şahidlərin iştirakı ilə o, öhdəliyi imzalayıb. Lakin burada da fırıldaq edib və bir qəpik daha ödəməyərək dəzgahı naməlum şəxsə satıb. Anasına heç vaxt zəng etməmişəm, yanıma gəlib Romanı xahiş edən o idi. O, sonuncu dəfə dekabrın əvvəlində mənə baş çəkərkən dedi ki, Romanı bu hərəkətlərə zavodun rəhbəri, Qırğızıstan vətəndaşı olan direktor müavini Vasilyev sövq edib. Dedim ki, Roman böyük oğlandır, gəlsin mənimlə danışsın. Uzun müddətdir ki, onun saxtakarlıqlarına dözürəm, vədinə əməl etməsə, hüquq-mühafizə orqanlarına müraciət etməli olacam. Ardınca o, mənə zəng edərək oğlunun sözlərini çatdırdı: “Hara istəyir getsin”. Ona görə də onun şəxsi şirkəti olduğu, ofisin kirayəsini ödədiyi, işçilərinin maaşını verdiyi və artıq bir neçə maşın aldığı halda, mən banka olan borcumu ödəyə bilmədiyim üçün hüquq-mühafizə orqanlarına müraciət etməkdən başqa yolum qalmadı”, – deyə o vurğulayıb.
Deputat fikrini belə yekunlaşdırıb: “Maraqlıdır, hansı pulla? Yusifov işdən çıxarkən şirkətin bir dənə də olsun sənədini təhvil verməyib, deyib ki, “sənə nə lazımdırsa, kompüterdə axtar”. Anasını başa düşürəm, amma bir daha deyirəm ki, böyük oğlandır, artıq 43 yaşı var, dələduzluq və hiylə işlətdiyini çox gözəl bilirdi. Və bankdan 2 dəzgah almaq üçün aldığı vəsaiti, şərikləri ilə birlikdə gizli şəkildə mənimsəməyə haqqı yox idi! Mənim kimisə hədələmək imkanım yoxdur və niyə də hədələyim ki? Anasının dediklərini başa düşmürəm, Romanı necə bağışlamağımı xahiş etdiyini xatırlasın. Qadının maaşına gəlincə, mən onu işə götürməmişəm, oğlu götürüb və yəqin ki, bütün işçilərlə olduğu kimi onunla da müqavilə bağlayıb, əgər şirkət direktorunun işinin öhdəsindən gələ bilmirsə, qazanc əldə edə bilmirsə, mənim xəbərim olmadan, maaşlarını ödəyə bilmədən və vergi ödəmədən insanları işə götürməsin. O, şərikləri kimi dələduzluq yolu ilə oğurlanmış kredit vəsaitlərini banka ödəməyə borcludur. O ödəməlidir, mən yox! Və necə deyərlər, ortada şəxsi heç nə yoxdur”.
Yelena Korabelnikovanın ittihamlarında adı keçən, Zabelinin köməkçisi Firdovsi Cahangirovla da əlaqə saxlanılıb. O, ittihamlara belə cavab verib: “Zabelinin Romanla bütün görüşlərində mən iştirak edirdim, o da öz növbəsində şahidi ilə gəlmişdi. Bizdə Romanın imzaladığı və borclarını ödəməyi öhdəsinə götürdüyü sənədlərin bütün surətləri var. Həmin sənədlər istintaq orqanlarına təqdim edilib. Romanın anasının dedikləri yalan və böhtandır. Bu gün (dünən) Yelena xanım mənə saat 14:25-də zəng vurdu və bildirdi ki, bir həftə ərzində banka olan borcunu ödəməyi öhdəsinə götürür. Onun iddia etdiyi kimi mənim tərəfimdən heç bir təhdid olmayıb. Amma deputat Zabelinə qarşı təhdidlər var idi və onlar Romanın dostlarından, qohumlarından gəlir”.
