Türkiyə Milli İstihbarat Təşkilatı (MİT) ölkə əleyhinə fəaliyyət göstərən irimiqyaslı beynəlxalq casusluq şəbəkəsinə qarşı uğurlu əməliyyat keçirib. Uzunmüddətli operativ təqib nəticəsində iki fərqli xarici xüsusi xidmət orqanına işləyən 9 şəxs müəyyən edilib.
NOCOMMENT.az xəbər verir ki, MİT-in Ankara Respublika Baş Prokurorluğu və Terrorla Mübarizə Şöbəsinin xüsusi qrupları ilə birgə apardığı təhqiqat çərçivəsində Türkiyənin 4 vilayətində eyni vaxtda reydlər təşkil olunub. Əməliyyat zamanı casusluq şəbəkəsinin rəhbəri B.E. daxil olmaqla 7 nəfər saxlanılıb, şəbəkənin digər 2 üzvünün isə artıq başqa cinayətlərə görə həbsxanada olduğu müəyyən edilib. Məhkəməyə sövq edilən 7 şübhəlinin hamısı barəsində həbs qərarı çıxarılıb.
Araşdırmalar zamanı məlum olub ki, B.E. və onun rəhbərlik etdiyi qrup Türkiyədəki qeyri-hökumət təşkilatları, dərnəklər, müxtəlif etnik qruplar və dövlət məmurları barədə mühüm, həssas məlumatları toplayaraq xarici kəşfiyyat orqanlarına ötürürmüş. MİT şəbəkə üzvlərini kiberizləmə, fiziki və texniki təqib metodları ilə addım-addım izləyərək onların rabitə xətlərini, hesabat üsullarını və pul köçürmə mexanizmlərini tam ifşa edib. Keçirilən bu strateji əməliyyatla xarici kəşfiyyat orqanlarının Türkiyədəki şəbəkə strukturu və hədəfləri tamamilə darmadağın edilib.
Sara
