Ermənistanda Qazaxın 4 kəndinin qarşılıqlı razılaşma əsasında azad edilməsilə bağlı gərginlik davam edir.
NOCOMMENT.az “azpolitika”ya istinadən xəbər verir ki, gün ərzində paytaxt İrəvan da daxil olmaqla, ölkənin bir neçə yerində avtomobil yolları revanşist və rusiyapərəst qüvvələr tərəfindən bağlanıb. Onlar kəndlərin Azərbaycana verilməsinə etiraz edirlər.
Bu arada ermənilər sözügedən kəndlərin çevrəsindəki mina sahələrinin təmizlənməsinin qarşısını almağa çalışırlar. Parlamentdəki Sarqsyan-Koçaryan cütlüyünün yaratdığı “Ermənistan” blokundan olan deputat Qarnik Danielyan deyib ki, əhali minatəmizləyənlərin fəaliyyətinə imkan verməməyə çalışır.
Həmçinin, minatəmizləyənlərin özləri də bu işi görmək istəmirlər:
“Bildiyiniz kimi, dünən burada gərgin vəziyyət yaranmışdı, insanlar minatəmizləmə işlərinin qarşısını almağa çalışırdılar. Dünən burada minatəmizləmə işi aparılmayıb, lakin Berkaber sahəsində aparılıb və işçilərdən biri yaralanıb. Əldə etdiyimiz məlumata görə, o, xəstəxanaya aparılıb və hazırda onun həyatı üçün təhlükə yoxdur. Bizdə məlumat var ki, bu günlərdə bir çox istehkamçılar minatəmizləmə işlərini yerinə yetirməkdən imtina edirlər. Bəziləri artıq ərizə yazır və işlərini tərk edirlər. Onlar bu işlə məşğul olmaq istəmədiklərini bildiriblər. Bu adamlar başa düşürlər ki, minatəmizləmə işləri aparmaqla bu minaları yığışdırmaqla indiki hakimiyyətin şəriki olurlar, azərbaycanlıları öz kəndlərinə, şəhərlərinə dəvət edirlər”.
Azərbaycanın qanuni ərazilərinin dinc yolla qaytarılmasına etirazlar göstərir ki, müharibədəki biabırçı məğlubiyyət və çoxsaylı itkilər hələ də erməni cəmiyyətinin əhəmiyyətli bir hissəsinə dərs olmayıb. Bunun nəticəsidir ki, onların bir çoxu revanşist və qatı milətçi qüvvələrin əlində alətə çevriliblər.
