“Qızıl qələm” mükafatını əvvəlcə 100, sonra 50, axırda 30 manata satan şəbəkə yadınızdadırmı? Həmin qrup indi daha prestijli qarşılanacaq yeni ödül quraşdırıb: “ULU ÖNDƏR” Fəxri Media Mükafatı. “15 iyun – Qurtuluş günü”ndə ilk təqdimatlarını ediblər. Nə yaxşı ki, laureat duyuq düşüb, işi tez anlayıb, “mükafatı” geri qaytarıb. Amma başqa ünvanlara üz tutmayacaqları nə məlum? Əgər “Qızıl qələm”i ucuzlaşdırıb gözdən saldıqları zaman layiqli cavablarını alsaydılar, indi bu cür oyunlarla risk etməzdilər”.
NOCOMMENT xəbər verir ki, bu sözləri Jurnalistlərin Həmkarlar İttifaqının sədri Müşfiq Ələsgərli özünün feysbuk hesabında yazıb.
Azərbaycan Respublikasında rəsmi “Heydər Əliyev” ordeninin mövcud olduğunu xatırladan Ələsgərli qarşı tərəfə belə bir sual ünvanlayıb: “KİV İşçilərinin Həmkarlar İttifaqının quraşdırdığı ödülün statusu nədir?”
O, daha sonra qeyd edib ki, dostlar bu cür hallarla üzləşəndə bizə – Jurnalistlərin Həmkarlar İttifaqına üz tuturlar: “Təşəkkürümü çatdırıram ki, bizi xəbərdar edirlər. Amma hər kəsin bilməsi lazım: bizim təşkilatımız Jurnalistlərin Həmkarlar İttifaqıdır (JuHİ), onlar isə KİV işçilərinin Həmkarlar ittifaqı”.
