İstanbulda Rusiya və ABŞ nümayəndələri arasında iki ölkənin diplomatik nümayəndəlikləri üçün fasiləsiz bank xidmətlərinin təmin edilməsi məsələsi ilə bağlı danışıqlar yekunlaşıb.
NOCOMMENT.az xəbər verir ki, bu barədə RİA Novosti məlumat yayıb.
ABŞ Dövlət Departamenti əldə olunmuş razılaşmaları möhkəmləndirmək üçün nota mübadiləsini təsdiqləyib. Dövlət Departamentinin rəsmi bəyanatında danışıqların konstruktiv xarakter daşıdığı vurğulanıb.
Görüş Rusiyanın İstanbuldakı Baş Konsulluğunun binasında baş tutub və nahar fasiləsi ilə təxminən 6 saat davam edib. Rusiya tərəfini ABŞ-dakı səfir Aleksandr Darçiyev, Amerika nümayəndə heyətinə isə dövlət katibinin Avropa və Avrasiya məsələləri üzrə köməkçisinin müavini Sonata Kulter rəhbərlik edib. Danışıqlarda hər iki ölkənin xarici işlər orqanlarının əməkdaşları da iştirak ediblər. Əldə olunan razılaşmaların təfərrüatları açıqlanmasa da, nota mübadiləsi Rusiya və ABŞ-ın diplomatik nümayəndəliklərinin fəaliyyəti ilə bağlı mühüm məsələnin həllində irəliləyişdən xəbər verir. Bu addım ikitərəfli münasibətlərin sabitləşməsinə kömək edə bilər, baxmayaraq ki, ölkələr arasında qarşılıqlı fəaliyyətin digər aspektləri gərgin olaraq qalır.
