Ermənistan sosial mediasında və bir sıra xəbər portallarında sabiq müdafiə naziri Seyran Ohanyanın həbsi ilə bağlı yayılan məlumatlar geniş rezonans doğurub. Yayılan xəbərlər qismən doğru olsa da, hadisənin hüquqi mahiyyəti və pərdəarxası təfərrüatları fərqlidir. Ermənistanın Korrupsiyaya Qarşı Mübarizə Məhkəməsi iyunun 12-də Seyran Ohanyan barəsində həqiqətən də həbs (məcburi məhkəməyə gətirilmə) qərarı çıxarıb. Lakin iddia edildiyi kimi, onun hansı səbəbdən ittiham olunduğunun bilinməməsi barədə xəbərlər tamamilə yanlışdır.
NOCOMMENT.az xəbər verir ki, Ermənistanın keçmiş müdafiə naziri və hazırda parlamentdəki müxalif “Ermənistan” fraksiyasının rəhbəri olan Seyran Ohanyan iyunun 12-də keçirilən məhkəmə iclasına gəlməkdən yayınıb. Hakimin rəsmi qərarına əsasən, onun prosesə qatılmaması səbəbindən barəsində həbs qətimkan tədbiri seçilib və məhkəməyə məcburi gətirilməsi barədə hüquq-mühafizə orqanlarına təxirəsalınmaz göstəriş verilib.
Seyran Ohanyanın hansı cinayət işinə görə cəlb olunduğu isə rəsmən məlumdur. O, Ermənistan tarixinə qanlı səhifə kimi düşən "1 Mart 2008-ci il hadisələri" — həmin vaxt keçirilən prezident seçkilərindən sonra dinc nümayişçilərə qarşı ordunun və polisin odlu silah tətbiq etməsi, nəticədə 10 nəfərin qətlə yetirilməsi üzrə açılmış cinayət işində əsas təqsirləndirilən şəxslərdən biridir. Əvvəlcə Ohanyan və sabiq prezident Robert Köçəryan konstitusiya quruluşunu devirməkdə ittiham olunsalar da, sonradan Kassasiya Məhkəməsi işi yenidən baxılması üçün Korrupsiyaya Qarşı Mübarizə Məhkəməsinə göndərib. Ohanyan hazırda həmin qanlı hadisələr zamanı ağır nəticələrə səbəb olan vəzifə səlahiyyətlərindən sui-istifadə etməkdə təqsirləndirilir.
Məlumat üçün xüsusi olaraq qeyd edək ki, Seyran Ohanyan 1992-ci ildə Qarabağda dinc azərbaycanlılara qarşı törədilən Xocalı soyqırımının əsas təşkilatçılarından, qatillərindən və hərbi cinayətkarlarından biridir. Bu qanlı fəaliyyətinə görə o, Azərbaycan Respublikasının hüquq-mühafizə orqanları tərəfindən çoxdan beynəlxalq axtarışa verilib. Ermənistanda hazırda ona qarşı aparılan bu məhkəmə prosesi isə Azərbaycan xalqına qarşı törətdiyi vəhşiliklərlə deyil, sırf ölkədaxili siyasi qisaslaşma və 2008-ci ilin daxili hadisələri ilə bağlıdır.
Sara,
NOCOMMENT.az
