Rusiya və Ukrayna arasında davam edən şiddətli hərbi münaqişənin təsirləri yenidən NATO üzvü olan qonşu dövlətin ərazisində hiss olunub. Ötən gecə baş verən hava hücumları zamanı Rumıniyanın suverenliyi növbəti dəfə sınağa çəkilib.
NOCOMMENT.az xəbər verir ki, Rumıniya Müdafiə Nazirliyinin rəsmi bəyanatına əsasən, Rusiyanın Ukrayna hədəflərinə yönəlmiş hücumu zamanı bir ədəd pilotsuz uçuş aparatı (PUA) Rumıniyanın milli hava məkanını kobud şəkildə pozub. Ölkənin radar sistemləri tərəfindən dərhal müəyyən edilən PUA-nın izi bir müddət sonra Ukrayna ilə sərhədin bilavissitə yaxınlığında yerləşən Çiliya Veke kəndinin cənub-şərq hissəsində itib. Hadisə ilə əlaqədar Rumıniya ordusu həyəcan vəziyyətinə gətirilib və PUA-nın qalıqlarının düşmə ehtimalı olan ərazilərdə genişmiqyaslı axtarış tədbirlərinə başlanılıb.
Qeyd edilməlidir ki, Rumıniya Ukrayna ilə 650 kilometrlik geniş quru sərhədinə malikdir və münaqişə başladığı gündən bəri bu cür insidentlər xroniki xarakter almağa başlayıb. Rusiya PUA-larının Rumıniya səmasına daxil olması və ya vurulmuş aparatların fraqmentlərinin NATO ərazisinə düşməsi Alyans daxilində təhlükəsizlik müzakirələrini daha da intensivləşdirib. Rəsmi Buxarest baş verənləri beynəlxalq hüququn pozulması kimi qiymətləndirərək müttəfiqlərini bölgədəki hava hücumundan müdafiə sistemlərinin gücləndirilməsi üçün birgə addımlar atmağa çağırıb. Ekspertlər hesab edirlər ki, sərhəd zonalarında artan bu cür gərginliklər münaqişənin coğrafiyasının NATO ölkələrinə doğru istənilməyən genişlənmə riskini hər an aktual saxlayır.
Sara,
NOCOMMENT.az
