Böyük Britaniya Rusiyanın dənizdəki fəaliyyətini cilovlamaq və bölgədəki təhlükəsizliyi gücləndirmək məqsədilə yeni çoxmillətli hərbi-dəniz qüvvələrinin yaradılması təşəbbüsü ilə çıxış edib. “Euractiv” nəşrinin məlumatına görə, London mövcud Birləşmiş Ekspedisiya Qüvvələri (JEF) bazasında daha sıx inteqrasiya olunmuş dəniz tərəfdaşlığı qurmağı təklif edir.
NOCOMMENT.az xəbər verir ki, bu təşəbbüs Şimali Avropanın on ölkəsini — Böyük Britaniya, Danimarka, Estoniya, Latviya, Litva, Niderland, Norveç, Finlandiya, İslandiya və İsveçi vahid hərbi platformada birləşdirməyi hədəfləyir. Britaniyanın Birinci Dəniz Lordu, admiral Qvin Censen Şimal-Qərb Avropası, Şimali Atlantika və Arktikanın müdafiəsi üçün bu addımın zəruri olduğunu bildirib.
Yeni plana əsasən, üzv ölkələr logistika, kadr və hərbi sistemlərdən ortaq istifadə edəcək, həmçinin sürətli yerləşdirmə qabiliyyətinə malik olacaqlar. Admiral Censen Rusiyanı əsas təhlükə adlandıraraq, Britaniya sularında rus hərbi aktivliyinin artdığını vurğulayıb. İttifaq çərçivəsində həm idarə olunan gəmilərdən, həm də pilotsuz platformalardan ibarət “hibrid donanma”nın yaradılması nəzərdə tutulur. Bu formatın NATO-nu əvəzləməyəcəyi, əksinə onu tamamlayacağı bildirilir. Əməkdaşlıq haqqında rəsmi bəyannamənin ilin sonunadək imzalanması gözlənilir.
Sara,
NOCOMMENT.az
