ABŞ Prezidenti Donald Tramp İrana qarşı tətbiq edilən dəniz blokadası və davam edən hərbi əməliyyatlarla bağlı iddialı açıqlamalar verib. Prezident Hörmüz boğazındakı “polad halqa”nın effektivliyini yüksək qiymətləndirərək, münaqişənin Vaşinqtonun tam nəzarəti altında olduğunu vurğulayıb.
NOCOMMENT.az xəbər verir ki, Tramp blokadanın gedişatını “möhtəşəm” adlandıraraq, ABŞ hərbi qüvvələrinin regionda heç bir müqavimətlə qarşılaşmadığını iddia edib:
“Blokada sadəcə olaraq heyrətamizdir. O, çox möhkəm və çox güclü şəkildə qurulub. Bizim üçün bu, artıq rutin bir işdir. Deyə bilərəm ki, İranla müharibə saat mexanizmi kimi dəqiq işləyir. Biz orada istədiyimiz hər şeyi edə bilərik. Bu müharibə kifayət qədər tez bitməlidir.”
Trampın bu bəyanatı aprelin 13-dən etibarən qüvvəyə minən rəsmi dəniz blokadasının fonunda səslənib. Xatırladaq ki, ABŞ Mərkəzi Komandanlığı (CENTCOM) Hörmüz boğazından İran limanlarına daxil olan və çıxan bütün gəmiləri yoxlamaq və lazım gəldikdə dayandırmaq barədə əmr alıb. Prezidentin sözlərinə görə, bu təzyiq üsulu rəsmi Tehranı nüvə proqramından tamamilə imtina etməyə məcbur etmək üçün ən effektiv vasitədir.
Baxmayaraq ki, “Daily Beast” kimi bəzi Qərb mediası blokadanın Çin və digər ölkələrə məxsus tankerlər tərəfindən deşildiyini iddia edir, Tramp bu xəbərləri əhəmiyyətsiz hesab edərək hərbi üstünlüyün tamamilə ABŞ tərəfində olduğunu bildirib. O, həmçinin qeyd edib ki, əgər İran sülh şərtlərini qəbul etməsə, növbəti hədəf ölkənin enerji infrastrukturu və desalinasiya (su təmizləmə) zavodları olacaq.
Hazırda dünya birliyi atəşkəs cəhdləri ilə Trampın “maksimum təzyiq” kursu arasındakı gərginliyi izləyir. Prezidentin “tezliklə bitəcək” vədi isə regionda daha böyük bir hərbi əməliyyatın, yoxsa İranın tam kapitulyasiyasının anonsu olduğu hələlik sual altındadır.
Sara,
NOCOMMENT.az
