Yaxın Şərqdə ABŞ və İran arasında uzun müddətdir davam edən gərginlik pik həddə çatıb. Tehran rəhbərliyi regionda yerləşən ABŞ hərbi obyektlərinə qarşı genişmiqyaslı raket və pilotsuz uçuş aparatları (PUA) ilə hücuma keçib.
NOCOMMENT.az xarici mətbuata istinadən xəbər verir ki, "Axios" nəşrinin jurnalisti Barak Ravid ABŞ administrasiyasındakı rəsmi mənbəyə əsaslanaraq İranın Küveyt, Bəhreyn və İordaniyadakı Amerika hərbi bazalarını hədəf aldığını bildirib. Məlumata görə, İran ərazisindən sözügedən bazalara doğru azı 4 ballistik raket və çox sayda kamikadze dronu buraxılıb.
İran Silahlı Qüvvələrinin "Xatəm əl-Ənbiyə" Mərkəzi Qərargahı da hücum faktını rəsmən təsdiqləyib. Qərargahın bəyanatında bildirilir ki, zərbələr xüsusilə ABŞ Hərbi Dəniz Qüvvələrinin Bəhreyndə yerləşən 5-ci Donanmasının qərargahına, həmçinin İordaniyadakı "Əl-Əzraq" və Küveytdəki hərbi hava bazalarına yönəlib. Bu kəskin addımın ABŞ ordusunun Hörmüz boğazında baş vermiş insidentdən sonra İranın cənubundakı sahil obyektlərinə və dəniz infrastrukturuna endirdiyi cavab zərbələrinə misilsiz bir reaksiya olduğu vurğulanır. Hücumdan dərhal sonra Bəhreyndə və digər hədəf bölgələrində hava həyəcanı siqnalları işə düşüb. ABŞ rəsmiləri raket və dronların böyük hissəsinin hava hücumundan müdafiə sistemləri tərəfindən zərərsizləşdirildiyini, ciddi tələfatın qeydə alınmadığını bildirsələr də, regionda irimiqyaslı qarşıdurmanın alovlanması qaçılmaz xarakter alıb.
Sara,
NOCOMMENT.az
