Rusiyanın ali hərbi komandanlığı ölkə prezidenti Vladimir Putini rus qoşunlarının payıza qədər bütün Donbası tamamilə ələ keçirə biləcəyinə inandırıb. Bundan dərhal sonra Kreml rəhbərinin Ukrayna əraziləri ilə bağlı tələblərini daha da sərtləşdirmək niyyətində olduğu bildirilir.
NOCOMMENT.az xəbər verir ki, bu barədə "Financial Times" qəzeti Rusiya lideri ilə təmasda olan iki anonim mənbəyə, məsələ ilə tanış olan daha iki şəxsə və Ukrayna kəşfiyyatının qiymətləndirmələrinə istinadən məlumat yayıb. Nəşrin yazdığına görə, Kreml üçün son məqsəd Kiyev və Odessa üzərində nəzarəti təmin etməkdir.
Məlumatlara görə, Putin cəbhə xəttindəki irəliləyişin zəifləməsini kompensasiya etmək üçün ABŞ Prezidenti Donald Trampı Ukrayna lideri Volodimir Zelenskini Donetsk vilayətinin qalan hissəsindən imtina etməyə məcbur etməyə razı salmağa ümid edirdi. O, müvafiq təklifi 2025-ci ilin avqustunda Alyaskada keçirilən sammitdə səsləndirib. Lakin ABŞ bu variantı nəzərdən keçirsə də, Tramp belə bir sazişi Ukraynaya diktə etməkdən imtina edib.
Eyni zamanda vurğulanır ki, əgər əvvəllər Kreml Ukraynanı yavaş-yavaş, lakin qaçılmaz şəkildə "sıxdığı" barədə illüziya yaratmağa çalışırdısa, indi Putinin ritorikası dəyişib. Üç məlumatlı mənbənin jurnalistlərə verdiyi açıqlamaya görə, Rusiya rəhbəri ərazi iddialarını artırmaqla hər hansı atəşkəs razılaşmasının "qiymətini" yüksəltməyi planlaşdırır.
Sara,
NOCOMMENT.az
