ABŞ Prezidenti Donald Tramp Ukraynadakı müharibə və Kiyev rəhbərliyinin mövqeyi ilə bağlı növbəti açıqlaması ilə diqqət çəkib.
NOCOMMENT.az xəbər verir ki, o, Ukrayna Prezidenti Volodimir Zelenskini daha realist yanaşma sərgiləməyə çağırıb və Ukraynanın vəziyyətinin getdikcə ağırlaşdığını deyib.
Trampın sözlərinə görə, Ukraynada uzun müddətdir seçkilər keçirilmir, ölkə isə böyük insan itkisi ilə üzləşir.
“Onlarda uzun müddətdir seçkilər keçirilmir. Onlar böyük itkilər verir. Ukraynalıların 82 faizi razılaşmanın əldə olunmasını tələb edir. Onlar bunun baş verməsini istəyirlər, mən bunu anlayıram. Ukrayna hər həftə minlərlə insan itirir. İnsanlar müharibənin bitməsini istəyirlər”, – deyə Tramp bildirib.
Tramp həmçinin qeyd edib ki, Ukraynada vəziyyətin daha da pisləşməməsi üçün tərəflərin mümkün qədər tez danışıqlara başlaması vacibdir. O, amerikalı seçicilər arasında da müharibənin uzanmasından narahatlığın artdığını vurğulayıb.
Prezident daha əvvəl də Ukrayna-Rusiya münaqişəsinin qısa müddətdə həll edilə biləcəyini iddia edərək, özünün hakimiyyətə qayıdacağı halda buna nail olacağını bəyan etmişdi.
