Barəsində həbs qətimkan tədbiri seçilmiş “Kanal 13” internet televiziyasının rəhbəri Əziz Orucova əlavə ittiham verilib.
NOCOMMENT.az xəbər verir ki, bu barədə onun yaxınları sosial şəbəkə hesabları vasitəsilə məlumat yayıblar.
Bildirilib ki, ona qarşı da Cinayət Məcəlləsinin 206.3.2. (qabaqcadan əlbir olan bir qrup şəxs tərəfindən qaçaqmalçılıq) maddəsi ilə ittiham irəli sürülüb.
Xatırladaq ki, daha əvvəl saxlanılan və barələrində həbs qətimkan tədbiri seçilmiş jurnalistlər Ülvi Həsənli, Sevinc Vaqifqızı, Hafiz Babalı və ictimai fəal Məhəmməd Kekalova da Cinayət Məcəlləsinin eyni maddəsi ilə ittiham irəli sürülüb.
Qeyd edək ki, noyabrın 27-də “Kanal 13” internet televiziyasının icraçı direktoru Əziz Orucovun evində axtarış aparılıb və daha sonra o saxlanılıb. Vəkili Bəhruz Bayramov bildirib ki, ona qarşı Cinayət Məcəlləsinin 188.2 (Mülkiyyət, istifadə və ya icarə hüququ olmadan torpaq sahəsi üzərində özbaşına tikinti və ya quraşdırma işləri aparma) maddəsilə cinayət işi başlanıb. Bir gün sonra – noyabrın 28-də isə Səbail Rayon Məhkəməsinin qərarı ilə Ə.Orucov barəsində üç ay müddətinə həbs qətimkan tədbiri seçilib.
