Yaxın Şərqdə alovlanan regional müharibənin coğrafiyası gözlənilmədən daha da genişlənib. İran və İsrail arasında qarşılıqlı raket zərbələrinin ardınca, hərbi gərginlik dalğası regionun digər böyük gücü olan Səudiyyə Ərəbistanına da sıçrayıb.
NOCOMMENT.az xəbər verir ki, Səudiyyə Ərəbistanının rəsmi dövlət informasiya agentliyi "Saudi Press Agency" ölkənin hava məkanına hərbi müdaxilə barədə məlumat yayıb.
Krallığın Müdafiə Nazirliyinin rəsmi nümayəndəsinə istinadən verilən xəbərə görə, Səudiyyə Ərəbistanı Hərbi Hava Qüvvələrinə məxsus strateji aviabaza istiqamətində raket hücumu qeydə alınıb. Nazirlik rəsmisi bildirib ki, krallığın hava hücumundan müdafiə (HHM) qüvvələri operativ hərəkətə keçərək hədəfə doğru gələn iki ballistik raketi səmada vaxtında təsbit edib və onları uğurla zərərsizləşdirib.
Rəsmi bəyanatda hücum nəticəsində hərbi obyektdə hər hansı bir dağıntının qeydə alınmadığı, həmçinin xəsarət alanların olmadığı vurğulanıb.
Bu hücum regional münaqişənin miqyasını genişləndirərək geosiyasi vəziyyəti daha da mürəkkəbləşdirir. Hadisənin təfərrüatları və tərəflərin növbəti bəyanatları barədə məlumatlar daxil olduqca təqdim ediləcək.
Əli Səfərli,
