Azərbaycanın bank sektorunda maliyyə sabitliyinin monitorinqi məqsədilə iyunun 7-dən etibarən yeni stres-test standartları tətbiq olunmağa başlayır. Mərkəzi Bankın tələbi ilə həyata keçirilən bu proses çərçivəsində banklar və xarici filiallar müxtəlif makroiqtisadi ssenarilər qarşısında öz dayanıqlığını nümayiş etdirməli olacaqlar. Qiymətləndirmə zamanı əsas diqqət bankların kredit və likvidlik risklərini necə idarə etməsinə, istifadə olunan dataların mənbəyinə və modellərin sərtlik dərəcəsinə yönəldiləcək.
Bu yoxlamalar bankların daxili idarəetmə orqanlarının, xüsusilə İdarə Heyətinin risklərdən nə dərəcədə məlumatlı olduğunu və daxili auditin bu sahədəki nəzarət mexanizmlərini üzə çıxarmağa xidmət edəcək. Prosesin effektivliyi həm də bankların kadr potensialı və texniki resurslarının bu tip mürəkkəb hesablamaları aparmağa yetərli olub-olmamasından asılıdır.
Məsələ ilə bağlı NOCOMMENT.az-a danışan hüquqşünas Əkrəm Həsənov qeyd edib ki, yeni qaydalar bankların fəaliyyətinə nəzarətin sərtləşdirilməsi və hesabatlılığın artırılması istiqamətində atılan inzibati bir addımdır: "Bu testlərin keçirilməsi bankların qarşısında duran hüquqi öhdəlikləri konkretləşdirir və onlardan öz maliyyə vəziyyətlərini daha şəffaf şəkildə analiz etməyi tələb edir".
Onun sözlərinə görə, təqdim olunan suallar bloku bankların daxili prosedurlarının requlyativ tələblərə uyğunluğunu yoxlamaq üçün nəzərdə tutulub: "Bank məsul şəxslərinin ssenari seçimi və data analizi ilə bağlı verəcəyi cavablar, qurumun real risk mənzərəsini nə dərəcədə düzgün qiymətləndirdiyini və daxili koordinasiyanın hansı səviyyədə olduğunu göstərən əsas indikatorlar olacaq".
Hüquqşünasın sözlərinə görə, stres-testlərin nəticələri bankların gələcək fəaliyyət strategiyasına təsir göstərə bilər: "Nəticələrin təhlili banklara öz zəif tərəflərini müəyyən etməyə imkan verəcək, lakin bu prosesin real faydası bankların bu testlərin nəticələrinə əsasən konkret sağlamlaşdırma tədbirləri görüb-görməyəcəyindən asılı olacaq".
Tunar,
