İsraildə parlament seçkiləri ərəfəsində daxili siyasi xal qazanmaq məqsədilə gündəmə gətirilən və 1915-ci il hadisələrinin "erməni soyqırımı" kimi tanınmasını nəzərdə tutan təxribatçı təşəbbüs rəsmi Bakının sərt və qətiyyətli diplomatik müqaviməti nəticəsində iflasa uğrayıb.
Xarici işlər naziri Gideon Saarın ictimaiyyətə bəyan etdiyi bu addımdan dərhal sonra Azərbaycan tərəfi Təl-Əvivə strateji tərəfdaşlığın gələcəyini riskə ata biləcək statusda xəbərdarlıq göndərib. "Ynet" agentliyi və "Haaretz" qəzeti kimi nüfuzlu media resurslarının hökumət mənbələrinə istinadən yaydığı məlumatlar təsdiq edir ki, Azərbaycanın xarici işlər naziri Ceyhun Bayramovla əlaqə saxlayaraq vəziyyəti "anlayışla qarşılamağı" xahiş edən İsrail tərəfi, Bakının güzəştsiz mövqeyi qarşısında geri çəkilmək və prosesi dondurmaq məcburiyyətində qalıb.
Beynəlxalq analitiklər və region üzrə ekspertlər də bu hadisəni İsrailin daxili siyasi konyunkturaya hesablanmış ciddi bir səhvi və Azərbaycanın regional diplomatik çəkisinin növbəti nümayişi kimi qiymətləndirirlər. Məsələnin pərdəarxasını və bundan sonrakı mümkün ssenariləri dəyərləndirmək üçün mövzunu daha dərindən təhlil etməyə ehtiyac yaranır.
Məsələ ilə bağlı NOCOMMENT.az-a danışan politoloq Qabil Hüseynli qeyd edib ki, İsrail rəsmilərinin seçkiönü dövrdə erməni kartından istifadə etmək cəhdi həm siyasi, həm də strateji baxımdan çox uğursuz və düşünülməmiş bir gediş idi: "İsrail daxilindəki müəyyən siyasi dairələr, xüsusən də xarici işlər naziri Gideon Saar parlament seçkiləri ərəfəsində erməni lobbisinin və bəzi sol təmayüllü seçicilərin səsini qazanmaq üçün belə bir həssas mövzunu manipulyasiya etməyə çalışdı. Lakin onlar Azərbaycanın bu məsələdəki həssaslığını və qətiyyətini düzgün hesablaya bilməmişdilər. Bakı dərhal diplomatik kanallarla ən yüksək səviyyədə öz etirazını bildirdi və bunun iki ölkə arasındakı strateji və iqtisadi tərəfdaşlığa birbaşa zərbə vuracağını diqqətə çatdırdı. İsrail hökuməti anladı ki, Azərbaycan kimi etibarlı və əvəzolunmaz bir müttəfiqi itirmək, seçkidə qazanılacaq bir neçə min səsdən qat-qat böyük geosiyasi itkilərə yol aça bilər. Məhz bu səbəbdən Təl-Əviv geri addım atmağa və layihəni dondurmağa məcbur oldu".
Onun sözlərinə görə, rəsmi Bakının ortaya qoyduğu bu kəskin reaksiya və əldə olunan nəticə Azərbaycan diplomatiyasının regionda diktə edən tərəfə çevrildiyini bir daha sübut edir: "Bu hadisə göstərdi ki, Azərbaycanla münasibətlərdə hər hansı bir dövlətin, hətta bu, İsrail olsa belə, qırmızı xətləri keçməsinə icazə verilməyəcək. Gideon Saarın azərbaycanlı həmkarı Ceyhun Bayramova zəng edərək vəziyyəti yumşaltmaq cəhdləri və 'anlayış' diləməsi Bakının prinsipial mövqeyi qarşısında heç bir nəticə vermədi. Hazırda İsrail mətbuatında da bu addımın nə qədər böyük bir səhv olduğu və ölkənin milli maraqlarına ziyan vurduğu açıq şəkildə yazılır. Lakin biz prosesin dondurulması ilə tam sakitləşməməliyik; seçki prosesi başa çatana qədər bu cür manipulyasiyaların yenidən gündəmə gəlməyəcəyinə zəmanət yoxdur. Azərbaycan tərəfi ayıq-sayıqlığı qorumalı və İsrail daxilindəki prosesləri diqqətlə izləməyə davam etməlidir ki, bu məsələ tamamilə və birdəfəlik qapadılsın".
Tunar,
NOCOMMENT.az
