Azərbaycanda Çin dilinə marağın sürətlə artması artıq sadəcə fərdi bir maraq deyil, ölkənin iqtisadi və strateji prioritetlərinin dəyişməsinin məntiqi nəticəsidir. Bir vaxtlar ekzotik hesab edilən bu dil, hazırda əmək bazarında rəqabət qabiliyyətini artıran ən vacib alətlərdən birinə çevrilib. Azərbaycan Dillər Universitetinin nəzdindəki Konfutsi İnstitutu və müxtəlif təhsil ocaqlarında bu dilin tədrisinin genişlənməsi, həmçinin yüzlərlə gəncin Çinşünaslıq sahəsinə yönəlməsi Azərbaycanda yeni bir intellektual dalğanın formalaşdığını göstərir. Bu tendensiya həm də Çin şirkətlərinin ölkə iqtisadiyyatındakı payının artması və birgə layihələrin miqyasının genişlənməsi ilə birbaşa bağlıdır.
Məsələ ilə bağlı NOCOMMENT.az-a danışan təhsil eksperti Fuad Hacıyev bildirib ki, Çin dilinə tələbatın artması ilk növbədə "Bir kəmər, bir yol" layihəsi çərçivəsində Azərbaycanın mühüm tranzit mərkəzinə çevrilməsi ilə əlaqədardır: "Hazırda Azərbaycanda 300-dən çox Çin şirkətinin fəaliyyət göstərməsi əmək bazarında spesifik kadr ehtiyacı yaradır. İşəgötürənlər artıq yalnız ingilis dili bilən deyil, həm də birbaşa Çin tərəfdaşları ilə kommunikasiya qura bilən, texniki və iqtisadi terminologiyaya hakim mütəxəssislər axtarırlar. Bu tələbat həm tərcüməçilər, həm də mühəndislik və logistika sahəsində çalışan kadrlar üçün böyük karyera imkanları deməkdir. Təhsil sahəsindəki canlanma da məhz bu real iqtisadi mənzərədən qaynaqlanır".
Onun sözlərinə görə, Çin dilinin orta məktəblərə qədər yayılması və dövlət səviyyəsində müəllim hazırlığına başlanması bu prosesin uzunmüddətli strateji xarakter daşıdığını sübut edir: "Konfutsi İnstitutunun fəaliyyəti və regionlarda açılan filiallar göstərir ki, Çin dili artıq yalnız paytaxt Bakı ilə məhdudlaşmır. Elm və Təhsil Nazirliyinin orta məktəblər üçün Çin dili müəllimləri hazırlamaq planı çox yerində atılmış addımdır, çünki kadr çatışmazlığı bu sahədəki ən böyük maneədir. Gənclərin bu dilə marağının bir səbəbi də Çin dövlətinin təklif etdiyi geniş təqaüd proqramları və yay düşərgələridir. HSK kimi beynəlxalq sertifikat imtahanlarının Azərbaycanda keçirilməsi tələbələrə dünya səviyyəli təhsil və iş imkanlarına qapı açır".
Ekspert vurğulayıb ki, Çin dili biliklərinin artması Azərbaycanın qlobal iqtisadiyyatda manevr imkanlarını daha da gücləndirəcək: "İngilis və rus dilləri hələ də dominant olsa da, Çin dili gələcəyin perspektiv dili kimi mövqeyini bərkidir. Biz artıq görürük ki, Çin dili bilən gənclər iş tapmaqda digərlərindən daha sürətli və şanslıdırlar. Bu, sadəcə dil öyrənmək deyil, həm də dünyanın ən böyük iqtisadiyyatlarından biri ilə birbaşa inteqrasiya deməkdir. Azərbaycanın həm dövlət, həm də özəl sektorunda bu dilə olan ehtiyac yaxın onillikdə artan templə davam edəcək və bu, ölkələrimiz arasındakı siyasi-mədəni körpüləri daha da möhkəmləndirəcək".
Tunar,
