Xəzər dənizinin dayazlaşması və suyun səviyyəsinin kəskin şəkildə aşağı düşməsi regional ekoloji fəlakət riskini ən yüksək həddə çatdırıb.
Birləşmiş Millətlər Təşkilatının (BMT) təqdim etdiyi son hesabatlar dənizin gələcəyi ilə bağlı olduqca narahatedici mənzərəni ortaya qoyur.
NOCOMMENT.az xəbər verir ki, alimlərin proqnozlarına əsasən, növbəti 50 il ərzində Xəzər dənizində suyun səviyyəsi fasiləsiz və qarşısıalınmaz şəkildə azalmağa davam edəcək. Fəlakətin miqyası artıq kosmosdan belə aydın şəkildə qeydə alınır: peyk təsvirlərində dənizin çəkilməsi nəticəsində yaranan qum dayazlıqlarının balıqçı qəsəbələrini və liman infrastrukturunu sahil xəttindən tamamilə təcrid etdiyi görünür.
Suyun geri çəkilməsinin əsas səbəbi kimi qlobal istiləşmə göstərilir. Məhz iqlim dəyişikliyi dəniz səthində kritik dərəcədə yüksək buxarlanmaya yol açır.
Bu proses regionun unikal ekosistemini ciddi zərbə altında qoyub: su hövzəsinin sürətlə quruması bir çox fauna növünün, xüsusilə də nərə balıqlarının yer üzündən silinməsi təhlükəsini yaradır. Qeyd edək ki, hazırda dünyadakı nərə balığı populyasiyasının təxminən 90%-i məhz Xəzər dənizində cəmləşib.
Sara,
NOCOMMENT.az
