Pakistan Hərbi Hava Qüvvələrinə məxsus təlim-məşq təyyarəsinin qəzaya uğraması nəticəsində iki pilot faciəvi şəkildə həyatını itirib. Hadisə planlı təlim uçuşu zamanı baş verib.
NOCOMMENT.az xarici KİV-lərə istinadən xəbər verir ki, hərbi təlim təyyarəsi havaya qalxdıqdan bir müddət sonra naməlum səbəbdən idarəetməni itirərək sürətlə yerə doğru yönəlib və boş sahəyə çırpılıb. Zərbənin gücündən təyyarə dərhal alovlanaraq tamamilə külə dönüb.
Qəza yerinə dərhal hərbi və mülki xilasetmə briqadaları, həmçinin təhlükəsizlik qüvvələri cəlb olunub. Hadisə nəticəsində təyyarənin göyərtəsində olan hər iki pilotun (təlimatçı və kursant) aldığı ağır xəsarətlərdən hadisə yerindəcə həlak olduğu təsdiqlənib. İlkin məlumatlara görə, yerdə hər hansı mülki vətəndaş xəsarəti və ya ciddi dağıntı qeydə alınmayıb.
Pakistan Hərbi Hava Qüvvələrinin rəhbərliyi hadisə ilə bağlı dərhal bəyanat yayaraq baş vermiş qəzanın dəqiq səbəblərini araşdırmaq üçün xüsusi təhqiqat komissiyasının yaradıldığını elan edib.
Mütəxəssislər qəzanın texniki nasazlıq, yoxsa əlverişsiz hava şəraiti səbəbindən baş verdiyini müəyyənləşdirməyə çalışırlar.
Sara,
NOCOMMENT.az
