Xəzər dənizinin unikal endemik növü olan Xəzər suitilərinin kütləvi ölümü və onların nəslinin kəsilmə təhlükəsi uzun illərdir davam edən ciddi bir ekoloji problemdir.
NOCOMMENT.az xəbər verir ki, bu acınacaqlı mənzərənin və kütləvi tələfatın əsas səbəbləri kimi ekosistemin gərginliyi və qida çatışmazlığı qeyd olunur, çünki suitilərin əsas qida mənbəyi olan kilkə balıqlarının ehtiyatlarının azalması onların immun sistemini zəiflədir və ölüm riskini artırır.
Dəniz mühitinə atılan neft məhsulları və ağır metallar çirklənməyə səbəb olur, heyvanların orqanizmində toplanaraq ciddi zəhərlənmələrə yol açır. Keçmiş illərdə aparılan araşdırmalar zamanı suitilərdə yüksək patogenli quş qripi, neyrovirus infeksiyaları, taun və kəskin pnevmoniya kimi infeksion xəstəliklər aşkar edilib.
Antropogen təsir olaraq brakonyerlik və balıqçı torlarına düşmə halları da suitilərin tələfatına səbəb olan mühüm amillərdəndir. Bəzi hallarda sualtı zəlzələlər nəticəsində dəniz dibindən atmosferə atılan təbii qazların heyvanlarda boğulmaya səbəb olması kimi təbii amillər də ehtimal edilir.
Xəzər suitisi Azərbaycanın, eləcə də digər Xəzəryanı dövlətlərin "Qırmızı Kitab"ına daxil edilib və Azərbaycan 1952-ci ildən etibarən bu növün ovuna qadağa qoymuş ilk ölkədir. Beynəlxalq Təbiəti Mühafizə İttifaqının (IUCN) "Qırmızı siyahısı"nda isə bu növ "təhlükəli" statusunu daşıyır.
Son dövrlərdə dənizdə ekosistemin bərpası istiqamətində müsbət meyillər müşahidə olunsa da, suitilərin sayının artması üçün dənizin çirklənmədən qorunması və qida resurslarının bərpası vacibdir.
Tunar,
NOCOMMENT.az
