Ankaradan gələn son xəbərlər beynəlxalq hərbi-siyasi dairələrdə əsl bomba effekti yaradıb.
NOCOMMENT.az xəbər verir ki, Türkiyənin nüfuzlu "Hürriyet" qəzetinin tanınmış yazarı Abdulkadir Selvinin verdiyi məlumata görə, illərdir Türkiyə-ABŞ münasibətlərində ən böyük "düyün" olan S-400 zenit-raket komplekslərinin taleyinə aydınlıq gəlib. Türkiyə rəsmilərinin aylardır gizli saxladığı və intensiv danışıqlar apardığı bu mürəkkəb proses, nəhayət, nəticəsini verib və sistemlərin Körfəz ölkələrindən birinə satılması barədə razılıq əldə olunub.
Bu sövdələşmənin arxasında dayanan əsas amil regionda İran və ABŞ arasında artan gərginlikdir. Həm Birləşmiş Ərəb Əmirlikləri (BƏƏ), həm də Qətər bu gərginlik fonunda öz hava məkanlarını qorumaq üçün effektiv bir müdafiə qalxanı axtarışında idilər.
Abdulkadir Selvi qeyd edir ki, əsas məqam təkcə satışın özü deyil, həm də bu addımın Türkiyənin geosiyasi kursuna təsiridir. Belə ki, sistemlərdən xilas olan Ankara, Vaşinqtonun "CAATSA" sanksiyaları çərçivəsində tətbiq etdiyi qadağaların ləğvi üçün tarixi şans qazanır.
Bu qərar Türkiyənin müdafiə sənayesi üçün strateji bir dönüş nöqtəsi sayıla bilər. Əgər proses proqnozlaşdırıldığı kimi davam edərsə, Türkiyənin uzun müddətdir uzaqlaşdırıldığı F-35 "beşinci nəsil" qırıcı proqramına geri qayıtması üçün heç bir maneə qalmayacaq. Beləliklə, Ankara həm yerli hava hücumundan müdafiə sistemlərini inkişaf etdirməyə davam edəcək, həm də Qərb istehsalı olan ən son texnologiyalarla öz hava qüvvələrini gücləndirmək imkanını əldə edəcək. Rəsmi Ankaranın bu gün edəcəyi gözlənilən açıqlama, regiondakı hərbi tarazlığı kökündən dəyişə bilər və Türkiyə-NATO münasibətlərində yeni, daha müsbət bir səhifənin açılmasına şərait yarada bilər.
Əli Səfərli,
NOCOMMENT.az
