Uşaq uzun müddət təhsildən yayınırsa, bu barədə məktəb direktorları polisə məlumat verməlidir.
NOCOMMENT.az xəbər verir ki, bunu “Uşaq müdafiəsi: dialoq mühiti və qurumlararası əməkdaşlıq” mövzusunda keçirilən konfransa qatılan Bakı Şəhər Baş Polis İdarəsinin İctimai Təhlükəsizlik İdarəsinin baş inspektoru Kəmalə Ələkbərova deyib.
O qeyd edib ki, İdarə bu istiqamətdə məktəb direktorlarına məktublar ünvanlayıb: “Artıq bir neçə belə hadisənin qarşısı alınıb. Direktorlar DİN ilə yaxından əməkdaşlıq etməlidir. Nəticədə erkən ailə qurmaq problemini bu yolla həll edə bilərik”.
Qeyd edək ki, Dövlət Statistika Komitəsi 2021-ci ildə 18 yaşadək analar tərəfindən doğulan uşaqların ümumi sayının 9476 nəfər olduğunu açıqlayıb. Rəsmi statistikaya əsasən, 9476 nəfərin 84-ü 16 yaşa qədər olan analar, 341-i 16 yaşlı analar (ümumilikdə 425 nəfər), 1225-i 17 yaşlı olan analar, 2972-i 18 yaşlı analar, 4854-i 19 yaşlı analar tərəfindən doğulanlardır.
