“Bakı Mühəndislik Universiteti” Publik Hüquqi Şəxsi tərəfindən keçirilən tender müsabiqəsinin qalibi məlum olub.
NOCOMMENT.az xəbər verir ki, tender müsabiqəsinin qalibi “Gesco” ASC olub.
Müsabiqənin şərtinə görə bu şirkət 2024-cü ildə “Bakı Mühəndislik Universiteti”nə 29 nəfərlə mühafizə xidməti göstərəcək. Onlardan 1-i xidmət rəisi, 3-ü növbə rəisi, 1-i qadın olmaqla 25-i isə mühafizəçi olacaq. Göstərilən xidmətin qarşılığında “Gesco” ASC Bakı Mühəndislik Universitetindən 312 min 511 manat 20 qəpik alacaq.
Qeyd edək ki, son 4 ildir Bakı Mühəndislik Universitetinin mühafizəsi “Gesco” ASC-yə həvalə olunur.
Onu da bildirək ki, Bakı Mühəndislik Universiteti 2024-cü ildə “Gesco” ASC-yə mühafizə xidmətinə görə builkindən 19 qəpik artıq vəsait ödəyəcək. Belə ki, 2023-cü ildə eyni sayda (29 nəfər) mühafizəçi üçün Bakı Mühəndislik “Gesco” ASC-yə 312 min 511 manat 1 qəpik ödəyib.
Məlumat üçün bildirək ki, “Gesco” ASC 26 may 2005-ci il tarixində dövlət qeydiyyatına alınıb. Nizamnamə kapitalı 4 min manat olan ASC-nin qanuni təmsilçisi Camalzadə Murad Fərrux oğludur./Yeniavaz.com
