“WhatsApp” istifadəçiləri üçün uzun müddətdir gözlənilən yeni funksiya “istifadəçi adı” sistemi istifadəyə verilməyə hazırlaşır. Bu yenilik sayəsində artıq platformada ünsiyyət üçün telefon nömrəsini paylaşmağa ehtiyac qalmayacaq.
NOCOMMENT.az xəbər verir ki, yeni sistemlə istifadəçilər özlərinə unikal istifadəçi adı seçərək digər insanlarla məhz həmin ad vasitəsilə əlaqə qura biləcəklər. Bu funksiya xüsusilə tanımadıqları şəxslərlə, icma qrupları və biznes hesabları ilə daha təhlükəsiz və rahat ünsiyyət qurmaq istəyənlər üçün nəzərdə tutulub.
Məlumata görə, “WhatsApp”-da istifadəçi adı funksiyası digər sosial şəbəkələrdəki sistemlərə bənzər şəkildə işləyəcək və hər bir istifadəçi yalnız özünə məxsus, unikal ad seçə biləcək.
Funksiya aktiv edildikdən sonra istifadəçilər “WhatsApp” Parametrlər bölməsinə daxil olaraq Hesab menyusu üzərindən “İstifadəçi adı” bölməsinə keçid edəcək və istədikləri adı daxil edəcəklər. Seçilən istifadəçi adı artıq mövcud olarsa sistem bu barədə xəbərdarlıq edəcək və alternativ ad seçimi tələb olunacaq.
“WhatsApp” bildirir ki, yeni xüsusiyyət bütün istifadəçilərə eyni vaxtda təqdim edilməyəcək və mərhələli şəkildə aktivləşdiriləcək. “İstifadəçi adı” bölməsi hələ görünməyən istifadəçilər isə yeniləmənin onlara çatmasını gözləməlidirlər.
Yeni funksiya tam aktiv olduqdan sonra istifadəçilər telefon nömrələrini paylaşmadan daha məxfi və rahat şəkildə ünsiyyət qura biləcəklər.
