Son aylarda Azərbaycana idxal olunan ətlərin qiyməti yerli bazarda satılan ətlərlə müqayisədə xeyli aşağıdır. Buna görə də xaricdən gətirilən ət məhsullarına tələbat sürətlə artır.
Hazırda mağaza və bazarlarda Monqolustan və Braziliyadan gətirilmiş ətlər üstünlük təşkil edir. Rəsmi məlumatlara əsasən, ötən il Azərbaycana idxal olunan ətin həcmi əvvəlki illə müqayisədə 41 faiz artıb.
Bəs görəsən, digər ölkələrdən Azərbaycana idxal olunan ətlərlə bağlı monitorinq həyata keçirilirmi? Sözügedən ətlərin keyfiyyəti ilə bağlı vəziyyət nə yerdədir?
Azərbaycan Qida Təhlükəsizliyi Agentliyindən (AQTA) Oxu.Az-ın sorğusuna cavab olaraq bildirilib ki, qurum tərəfindən istər ölkəyə idxal olunan, istərsə də yerli istehsal edilən bütün qida məhsulları üzərində risk əsaslı nəzarət tədbirləri görülür.
Məlumatda qeyd olunub ki, xarici ölkələrdən Azərbaycana gətirilən diri heyvanlar, həmçinin ət və ət məhsulları qida təhlükəsizliyi nəzarətindən keçilir: “Agentlik tərəfindən həmin ixracatçı ölkədəki epizootik vəziyyətə uyğun olaraq öncədən yüklərin ölkəyə gətirilməsinə icazə verilir. Yük partiyası bilavasitə ölkəyə idxal olunduqdan sonra AQTA-nın regional bölmələrinin əməkdaşlarının nəzarəti ilə yükə baxış keçirilir, məhsullardan nümunələr götürülür, müayinə məqsədilə laboratoriyalara təqdim olunur. Laborator analiz nəticələri qida təhlükəsizliyi tələblərinə cavab verdikdə, dövriyyəyə buraxılır. Bildiririk ki, belə məhsulların daşınması, satışı, dövriyyəsi zamanı etiketlənməyə, saxlama şəraitinə, temperatur rejiminə və s. tələblərə riayət edilməlidir. İstehlakçılar satıcıdan məhsulun müşayiətedici sənədlərini tələb edə bilərlər. Sonda qeyd edirik ki, istehlakçılar qida təhlükəsizliyi tələblərinin pozulması halları ilə rastlaşdıqda, agentliyin “1003” çağrı mərkəzinə zəng vuraraq və ya “e-Qidam” mobil tətbiqi vasitəsilə məlumat verə bilərlər”.
***11:12
Son aylarda mağaza və bazarlarda Monqolustandan gətirilən ət alıcılar arasında böyük maraq doğurub.
NOCOMMENT.az milli.az-a istinadla xəbər verir ki, kilosu cəmi 12 manata satılan bu ətlər artıq bir çox marketin vitrinində yerli məhsulları sıxışdırır.
Rəsmi məlumata görə, ötən il ölkəyə idxal olunan ətin həcmi 41% artıb.
Braziliya, Qazaxıstan, Belarus və hətta Avropadan gətirilən ət növləri də bazarda geniş yayılıb.
Qida Təhlükəsizliyi Agentliyi bildirir ki, idxal olunan bütün ət məhsulları xəstəliklərdən azad bölgələrdəki müəssisələrdən gətirilir və baytarlıq sertifikatı ilə təsdiqlənir.
