Azərbaycan Dövlət Neft və Sənaye Universitetində (ADNSU) yeni kadr təyinatı olub.
NOCOMMENT.az xəbər verir ki, bu barədə müvafiq əmr imzalanıb.
Əmrə əsasən, Seymur Nəcəfov universitetin Maliyyə və Təminat Departamentinin direktoru - baş mühasib təyin olunub.
Digər əmrlə, ADNSU-nun maliyyə və təsərrüfat məsələləri üzrə prorektoru vəzifəsinin müvəqqəti icrası da ona tapşırılıb.
Qeyd edək ki, Seymur Əsgər oğlu Nəcəfov 24 avqust 1987-ci ildə Bakı şəhərində doğulub. 2005-ci ildə Bakı Atatürk Liseyindən məzun olub.
Azərbaycan Dövlət Neft Akademiyasının beynəlxalq iqtisadi münasibətlər ixtisası üzrə 2009-cu ildə bakalavriat səviyyəsini, 2012-ci ildə magistratura səviyyəsini bitirib. 2014-2018-ci illərdə mühasibat uçotu ixtisası üzrə UNEC-in Mühasibat uçotu və audit kafedrasının dissertantı olub.
2010-2012-ci illərdə Kənd Təsərrüfatı Nazirliyinin Təchizat Bazasında xəzinədar, mühasib vəzifələrində çalışıb. 2012-2013-cü illərdə “Azərsu” Açıq Səhmdar Cəmiyyətində mühasib, Mərkəzi Laboratoriyanın Mühasibat uçotu və hesabatı şöbəsinin rəisi-baş mühasib vəfizələrində işləyib. 2013-2014-cü illərdə “Azərsu” Açıq Səhmdar Cəmiyyətinin İdarəetmə aparatının Mühasibat uçotu və hesabatı şöbəsinin rəis müavi olub.
2014-2015-ci illərdə UNEC-in Maliyyə və təminat departamentinin Təhsil haqlarının uçotu və bank əməliyyatları şöbəsinin müdiri, 2015-2021-ci illərdə departamentin direktor müavini-baş mühasibin müavini vəzifələrində işləyib.
Son təyinata qədər UNEC-in Maliyyə və təminat departamentinin direktoru-baş mühasib vəzifəsini tutub.
