ABŞ Kolumbiyanın yeni prezidenti Abelardo de la Espriellanın administrasiyasını dəstəkləmək üçün 1 milyard dollar ayıracaq.
NOCOMMENT.az xəbər verir ki, bu barədə məlumat Dövlət Departamentinin mətbuat xidmətinin yaydığı bəyanatda yer alıb. Sənədə görə, Tramp administrasiyası Konqreslə əməkdaşlıq çərçivəsində yeni Kolumbiya prezidentini "dəstəkləmək üçün 1 milyard dollarlıq təhlükəsizlik yardımı paketi elan etmək niyyətindədir".
Bəyanatda vəsaitin Qərb yarımkürəsində mütəşəkkil cinayətkarlıq və narkotik qaçaqmalçılığı ilə birgə mübarizə aparmaq üçün istifadə edilməsi planlaşdırıldığı izah olunur. Bundan əlavə, vəsaitin bir hissəsinin iqtisadi layihələrin inkişafına, ticarətə və vacib mineralların hasilatına xərclənməsi planlaşdırılır.
Daha əvvəl andiçmə mərasimindən sonra dövlət başçısı kimi ilk çıxışında de la Espriella ölkəsinin ABŞ tərəfindən yaradılan "Amerika Qalxanı" alyansına qoşulacağını açıqlayıb. 7 martda ABŞ prezidenti Mayamidə keçirilən "Amerika Qalxanı" sammitində bir neçə Latın Amerikası ölkəsinin liderlərini qəbul edib. Onların arasında Argentina, Boliviya, Honduras, Kosta Rika, Panama, Paraqvay, El Salvador, Ekvador və Çilinin seçilmiş prezidenti də var idi. De la Espriellanın sələfi Qustavo Petro görüşə dəvət olunmayıb. Sammit zamanı Amerika lideri narkotik kartellərinə qarşı beynəlxalq hərbi koalisiya yaradıldığını elan edib.
