Ukraynanın Rusiya ərazisinə endirdiyi dron zərbələrinin miqyası və intensivliyi sürətlə artmaqdadır. Əgər yaxın keçmişdə gecə ərzində onlarla PUA istifadə olunurdusa, hazırda bu rəqəm artıq yüzlərlə ölçülür və hücum coğrafiyası Rusiyanın yeni bölgələrini əhatə edir.
NOCOMMENT.az xəbər verir ki, "İnformasiya Müqaviməti" qrupunun hərbi-siyasi icmalçısı Aleksandr Kovalenko "Minval Politika"ya verdiyi müsahibədə Rusiya hava hücumundan müdafiə (HHM) sistemlərinin imkanlarını, müharibənin gedişatına və danışıqlar perspektivinə təsir edən bu yeni reallığı şərh edib.
Ekspertin sözlərinə görə, Rusiya "Yolka" və "Arxangel" kimi özünün kiçik ölçülü dron-qırıcılarını istehsal etməklə Ukraynanın taktikasını təkrarlamağa çalışsa da, bu vasitələr hələlik yetərli səmərə vermir. Rusiya ənənəvi olaraq mobil atəş qrupları və aviasiya, xüsusilə Mi-28 hücum helikopterləri vasitəsilə müdafiəni təmin etməyə çalışsa da, əsas problem HHM sistemlərinin kəskin çatışmazlığıdır. Ukraynanın pilotsuz sistemlər qüvvələri aylıq 30-40 ədəd Rusiya zenit-raket kompleksini məhv edir, lakin Rusiya sənayesi bu itkiləri kompensasiya edə biləcək sürətlə yeni texnika istehsal etmək gücündə deyil.
Texnoloji baxımdan Ukrayna tamamilə fərqli bir yol tutub. Rusiya əsasən İranın "Shahed" (Geran) layihələrini lokallaşdırmağa üstünlük verdiyi halda, Ukrayna müxtəlif tapşırıqlar üçün ixtisaslaşdırılmış (Firepoint, Bars, Bobber) və 2000 km-dən çox mənzilə malik olan daxili platformalar yaradıb. Bu sistemlər Rusiya HHM-nin sıxlığını və döyüş tapşırıqlarının xüsusiyyətlərini nəzərə alaraq daim təkmilləşdirilir. Kovalenkonun fikrincə, 3000 km və daha uzaq məsafələrə zərbə vura bilən Ukrayna dronlarının meydana çıxması artıq fantastika deyil, zaman məsələsidir.
Rusiya ərazisindən dronların idarə edilməsi ilə bağlı iddialara gəlincə, ekspert bunu sistemin uğursuzluğunu ört-basdır etmək üçün irəli sürülən bir versiya kimi qiymətləndirir. Onun fikrincə, hazırkı miqyasda hücumların bilavasitə Rusiya daxilindən həyata keçirilməsi xüsusi xidmət orqanlarının nəzarəti şəraitində qeyri-mümkündür və bütün daşınma zərbələri Ukrayna ərazisindən endirilir.
Ukraynanın hədəfi dinc əhalini qorxutmaq deyil, hərbi-sənaye kompleksi, neft emalı zavodları və logistik infrastruktur kimi müharibənin gedişinə birbaşa təsir edən strateji obyektləri sıradan çıxarmaqdır. Bu zərbələr Rusiya üçün həm iqtisadi, həm də reputasiya baxımından son dərəcə həssasdır; xüsusilə Moskvanın vurulması şəhərin "ən müdafiə olunan" imicini sarsıdır. Kovalenkonun proqnozuna görə, Ukraynanın istehsal gücü artdıqca, hücumların intensivliyi daha da artacaq və bir gecədə 1000-dən çox dronla zərbə endirilməsi ssenarisi reallığa çevriləcək.
Əli Səfərli,
