Rusiya ərazisində strateji sənaye obyektlərinə qarşı təşkil edilən pilotsuz uçuş aparatlarının (PUA) gecə hücumlarının hədəfi məlum olub. Stavropol diyarının Nevinnomıssk şəhərində yerləşən, ölkənin ən böyük kimya müəssisələrindən sayılan "Azot" kombinatı növbəti dəfə zərbələrə məruz qalıb.
NOCOMMENT.az xəbər verir ki, "ASTRA" teleqram kanalının apardığı OSINT (açıq mənbə kəşfiyyatı) analizlərinə əsasən, Ukrayna tərəfinin hücumu nəticəsində yanğının böyük ehtimalla məhz "Azot" kimya kombinatının ərazisində başladığı müəyyən edilib. Məlumata görə, bu, müharibənin gedişində sözügedən nəhəng zavoda qarşı qeydə alınan azı 7-ci hücumdur.
Mayın 20-nə keçən gecə Nevinnomıssk şəhərinin sakinləri güclü partlayış səsləri və ardınca başlayan yanğın barədə məlumat paylaşıblar. Şəhərin meri də rəsmi olaraq PUA hücumunun baş verdiyini təsdiqləyib. OSINT analitikləri şahidlərin Kalinin küçəsindən çəkdiyi və göy üzünü bürüyən yanğın parıltısını əks etdirən fotoların coğrafi koordinatlarını yoxlayaraq, alovun zavodun ərazisində ucaldığını müəyyən ediblər.
Qeyd edək ki, "Nevinnomısski Azot" Rusiyanın cənubundakı ən böyük kimya sənayesi müəssisəsidir və "EvroXim-Azot" holdinqinin tərkibinə daxildir. Zavod həm mülki aqrokimyada (gübrə istehsalı), həm də hərbi sahədə strateji əhəmiyyət kəsb edən ikili təyinatlı kimyəvi birləşmələr istehsal edir.
Sara,
