Xəbər verdiyimiz kimi, dünən Bakı Ağır Cinayətlər Məhkəməsində sabiq əmək və əhalinin sosial müdafiəsi naziri Səlim Müslümovun cinayət işi üzrə növbəti məhkəmə prosesi keçirilib.
NOCOMMENT yeniavaz-a istinadən xəbər verir ki, prosesdə Sabunçu rayonu, Maştağa qəsəbəsində təsərrüfat fəaliyyəti ilə məşğul olan Eldar Əliyev dindirilib. Eldar Əliyev bildirib ki, onun məlumatı olmadan adına şirkətlər açılıb: “Məlikhəsən adlı qonşum var idi. Hər dəfə onu görəndə işsizlikdən şikayət edirdim. Bir gün dedi ki, səni işə düzəldirəm, ayda 200 manat maaş alacaqsan. Maşınla apardı məni sənədlərə qol çəkdik. Mən nə bilim ki, adıma şirkət yaradıb. Necə şirkət rəhbəriyəm ki, evim başıma uçur. Adımı yaza bilməyən adamam, müəssisə nədir? Məlikhəsənin özünün də harada işlədiyini bilmirəm. Qəsəbədə onu quş saxlayan kimi tanıyırdıq”.
Məlumat üçün bildirək ki, vətəndaşların xəbəri olmadan onların adına şirkətlərin açılması və sonradan həmin şirkətlər vasitəsilə tenderlərdə və digər əməliyyatlarda saxtakarlığın aparılması barədə əvvəllər də dəfələrlə məlumatlar dərc olunub.
Lakin maraqlıdır ki, hüquq-mühafizə orqanları nə bu yazılarda, nə də sosial şəbəkələrdə yayılan məlumatlara bu günə kimi münasibət bildirməyib. Belə görünür ki, bu cür hallara hüquqi müstəvidə qiymət vermək üçün hansısa yüksəkrütbəli məmurun həbs olunması lazımdır.
