Süni intellektin marketinq sahəsində yaratdığı dəyişikliklər geniş müzakirə olunsa da, ekspertlər əsas riskin texnologiyanın özündə deyil, ondan düzgün istifadə etməyən marketoloqlarda olduğunu bildirirlər.
NOCOMMENT.az xəbər verir ki, marketinq sahəsi üçün ən böyük təhlükə süni intellekt (AI) deyil, bu texnologiyadan yanlış istifadə edən marketoloqlardır.
Ashtonbery Consulting şirkətinin təsisçisi və baş icraçı direktoru Will Saulsbery hesab edir ki, süni intellekt marketinqi məhv etməyəcək. Onun fikrincə, illərdir bu sahəyə ən çox zərər vuran amil peşəkar olmayan marketoloqlar olub və AI sadəcə onların işini daha da sürətləndirib.
Məqalədə qeyd olunur ki, hazırda marketoloqların 94 faizi süni intellektdən istifadə edir və AI əsaslı marketinq bazarının 2030-cu ilə qədər 84 milyard dollardan çox həcmə çatacağı proqnozlaşdırılır. Bununla yanaşı, müəllif vurğulayır ki, AI-dən istifadə edən hər kəs pis marketoloq deyil, lakin peşəkar olmayan marketoloqların demək olar ki, hamısı bu texnologiyadan yararlanır.
Saulsbery bildirir ki, sosial media platformalarında aşağı keyfiyyətli və təkrarlanan AI məzmununun artması istifadəçilərin reklamlara marağını azaldır, brendlərə olan etimadı zəiflədir və platformalardan uzaqlaşmaya səbəb olur. Onun sözlərinə görə, son dövrdə "Guess", "Vogue" və "Coca-Cola" kimi tanınmış şirkətlərin AI ilə hazırladığı bəzi reklam materialları da ictimaiyyət tərəfindən mənfi qarşılanıb.
Müəllif marketinq sektorunda digər mühüm problemlərdən birinin də "vanity metrics" - yəni bəyənmə, izləyici sayı və şərhlər kimi göstəricilərin həddindən artıq ön plana çıxarılması olduğunu qeyd edir. O hesab edir ki, bizneslər marketinq agentliklərinə sosial şəbəkələrdə daha çox bəyənmə toplamaq üçün deyil, satışlarını artırmaq üçün müraciət edirlər.
Məqalədə generativ süni intellektin düzgün istifadə edilmədikdə bazarı eyni tipli və fərdiləşdirilməmiş məzmunla doldurduğu, bunun isə istifadəçilərin etibarını azaltdığı vurğulanır. Bundan əlavə, AI mövcud məlumatlar əsasında işlədiyi üçün əvvəlcədən mövcud olan qərəzləri və stereotipləri də gücləndirə bilər.
Bununla yanaşı, müəllif süni intellektin düzgün tətbiq edildiyi halda marketinq üçün güclü alət olduğunu bildirir. O qeyd edir ki, AI kampaniyaların optimallaşdırılmasına, reklam xərclərinin azaldılmasına və investisiyanın geri dönüşünün (ROI) artırılmasına kömək edə bilər. Məsələn, AI-dən istifadə edilən sosial media kampaniyalarında reklamlarla qarşılıqlı əlaqə 47 faiz, avtomatlaşdırılmış reklam yerləşdirməsi isə Facebook reklam xərclərinin 35 faizədək azalmasına imkan yarada bilər.
Saulsberyin fikrincə, gələcəyin uğurlu marketoloqları AI-ni insan yaradıcılığı və düzgün strategiya ilə birləşdirənlər olacaq.
"Süni intellekt təkbaşına heç nə qazandırmayacaq. Ancaq AI güclü marketinq komandası ilə birləşdikdə uğurun əsas alətlərindən birinə çevrilə bilər", - deyə müəllif vurğulayır. (Valyuta.az)
