Rusiya Federasiyasının əməkdar artisti Anjelika Varumun Ukraynada hərbi əməliyyatların başlamasından dörd ay sonra Mayamidə gizli şəkildə ev aldığı məlum olub.
NOCOMMENT.az xəbər verir ki, müğənni 2022-ci ilin iyun ayında ABŞ-də 139 kvadratmetrlik kotteci 550 min dollara (o dövrün məzənnəsi ilə təxminən 33 milyon rubl) alıb.
Məlumata görə, Anjelika Varum ictimai şəkildə hərbi əməliyyatları pisləsə də, Rusiya vətəndaşlığı səbəbindən ABŞ-də sosial və hüquqi təzyiqlərlə üzləşəcəyindən və əmlakını itirəcəyindən ehtiyat edib. Bu risklərdən sığortalanmaq üçün o, hüquqşünasların məsləhəti ilə xüsusi bir sxemdən istifadə edib.
Belə ki, müğənni Floridada "Novarum" adlı Məhdud Məsuliyyətli Cəmiyyət (LLC) qeydiyyatdan keçirib. Bu şirkət "Xüsusi Təyinatlı Vasitə" (SPV) formatında fəaliyyət göstərir ki, bu da sahibinin şəxsi aktivlərini hər hansı maliyyə problemlərindən, məhkəmə iddialarından və fərdi sanksiyalardan tam qorumağa imkan verir. Varum yeni aldığı əmlakı məhz bu "qoruyucu şirkətin" adına rəsmiləşdirib.
1938-ci ildə inşa edilən kottec Mayaminin mərkəzindən 3 kilometr aralıda, məşhur çimərlikdən isə 10 dəqiqəlik məsafədə yerləşir. Üç yataq və üç vanna otağı olan evin illik vergi ödənişi isə təxminən 7 min dollardır.
