Həyat yoldaşı tapmaq ümidi ilə Qaraçay-Çərkəz Respublikasındakı məşhur "Sevgi gölü"nə yollanan iki gənc turist qız itkin düşüb.
"SHOT" teleqram kanalının yaydığı məlumata görə, Həştərxandan olan 24 yaşlı Daşa P. və 23 yaşlı Vika Q. aprelin 24-də Teberda şəhərindən marşrut üzrə hərəkətə başlayıblar.
NOCOMMENT.az xəbər verir ki, qızlar səfərdən əvvəl marşrutlarını rəsmi qeydiyyatdan keçiriblər. Daşa sosial şəbəkələrdə yol qeydləri apararaq bildirib ki, mayın 3-nə qədər Qafqazda olacaqlar, mayın 4-ü isə ehtiyat gündür. O, izləyicilərinə xəbərdarlıq edib ki, əgər bu tarixdən sonra əlaqə kəsilsə, Fövqəladə Hallar Nazirliyinə (FHN) zəng etsinlər. Turistlərlə sonuncu dəfə ötən gün saat 14:30 radələrində əlaqə saxlanılıb; onlar hava şəraitinin kəskin pisləşməsi səbəbindən xilasedicilərdən kömək istəyiblər, bundan sonra isə əlaqə tamamilə kəsilib.
Qeyd edək ki, qızların hədəfi 2400 metr hündürlükdə yerləşən "Sevgi gölü" olub. Yerli rəvayətə görə, bu göldə çimib ora sikkə atan şəxs tezliklə öz ağ atlı şahzadəsini tapır. Hazırda dağlıq ərazidə axtarış-xilasetmə tədbirləri davam etdirilir.
Sara,
NOCOMMENT.az
